بادين باسم الذي انشى الرعود *** الرعد سبح بحمدهـ والعباد
كل شي سبح بحمد الودود *** لاشكرنا الله زاد الخير زاد
الله الي هو على عبده يجود *** نحمد الجواد هو بالخير جاد
الله اللي مالكاً مافي الوجود *** مالكا يوم الحشر يوم التناد
الله اللي مالكا عاد وثمود *** اهلك اللي بث في الارض الفساد
الله اللي حط لعباده حدود *** من تعدى الحد والله مااستفاد
كل من فالكون للمولى سجود *** باسطاً سبع ورفع سبع شداد

يرحم الله الذي قاد الجنود  *** والهجاد اللي ماجا مثله هجاد
قادها اللي فوق فرسانه يقود *** قادها صقر الجزيره يوم قاد
سيفي اللي مع قويين العهود *** والبلا لاجيك الجدا ثم الزناد
في يديكم ياعريبين الجدود *** كل حر(ن)ينطلق وقت الهداد
ياعدون شين و فاله اسود *** جاك شبل من على ظهر الجواد
جاك ابو تركي عمى عين الحسود *** صابكم صيبه ورعباً وارتعاد
ثم فجر نحرك وخلق الله شهود *** ثم قالوا ياصليب الصوت ناد
الملك عبدالعزيز ابن سعود *** يوم نادى فزت قلوب العباد
بايعوا ووفوا بميثاق العهود *** من يخون العهد قيد بالقياد
واستمرت بالتطور والصعود *** واستتب الامن في كل البلاد
الله اللي عزنا ببن سعود *** جاهد وحقق مراده بالجهاد
جعل ابو تركي في جنات الخلود *** جعله يفوز برضا رب العباد

ياابو متعب انت لجنودك تقود *** لك من الشعب الولى والانقياد
سمعن وطاعه وحنا لك جنود *** لك جنود(ن)اوفياء ضد الفساد
ياولي العهد ياوافي العهود *** يااسد ياللي بحكم الله ســـاد
حكمكم بالشرع وتنفيذ الحدود *** الله اللي دلكم حكم الرشاد
لك تحيه عد همال الرعود *** عد نوم في المناسي يوم قاد
وعد مايثمر ثمر في كل عود *** وعد ماهبت نسانيس البراد
وعد من صلوا وللمولى سجود *** وعد من سبح بإسم رب العباد
وعد ماجادت يمينك بالنقود *** وعد ماقدمت من خير(ن)وزاد
بابك المفتوح كلن له يروح *** فاتح(ن)بابك وجعلك فالمراد
العتيبي يهديكم باقـة ورود *** رمزحب(ن)حطه الله فالفؤاد
موقف العتــبان مايبغى شهود *** قادهم صقر الجزيره يوم قاد
قادهم وسلاحهم نار الوقود *** قادهم مقدامهم راع الشداد
عزوتي لجاء لها مثل الرعود ***واشتعل بارودها وقت الهجاد
يشهد التاريخ في ماضي العهود *** ثابتات افعالنا علم (ن)وكاد
يـاعتيـبه ياعريبين الجـدود *** يااهل سيوف صقيلاتن حداد
يــاعتــيبه ياطوابير وحشود *** العدو لا شافهم جاهـ ارتعاد
ياعــتيبه يااســود من اســود *** لابكي لجا الاصبع فوق الزناد
ياعتيــبه ياجنــود ابن سعود *** ياهل الخيل الاصايل والجهاد
ياهل الابل حمرن ووضح وسود *** قادها اللي قام حضه واستفاد
ساميات ظهروها مثل النفود *** والفحل يازين مشيه بالقياد
ماوجد فيها شرود ولا ونود *** مرن نزهل ومره بالركاد
قلتي لي قولن مثل عد النقود *** قلت قولن ماعلي فيه انتقاد